“Amas da terra” nace dunha necesidade vital, emocional e profesional de mostrarlle ao mundo un dos piares que conforman a esencia da miña terra, Galicia, aqueles que lle dan unha personalidade única en termos de socioloxía, xeito de vida, educación, pensamento, economía e, por suposto, gastronomía: as mulleres.

"Sempre digo que a franxa azul da bandeira de Galicia podería substituírse por unha colaxe de miles de rostros de mulleres, xa que ningún outro símbolo representa mellor a Galicia, cada comarca, cada vila ou aldea". A muller como soporte dun territorio. Un símbolo histórico, antropolóxico, do pasado, pero tamén do presente e do futuro. Galicia é un nome feminino.